Tum ko fursat ho meri jaan toh idhar dekh toh lo

Tum ko fursat ho meri jaan toh idhar dekh toh lo,
Chaar aankhen na karo ek nazar dekh toh lo..

Baat karne ke liye kaun tumhen kehta hai,
Na karo hum se koi baat magar dekh toh lo..

Apne beemaar-e-mohabat ki tasalli ke liye,
Haal-e-dil poochh toh lo, zakhm-e-jigar dekh toh lo..

Dil-e-barbaad ko aabaad karo ya na karo,
Kam se kam tum mera ujda hua ghar dekh toh lo ...!!